पुणे जिल्ह्यातील मावळ तालुक्यात इंद्रायणी नदीवरील पूल कोसळल्याने एक अत्यंत दुर्दैवी घटना घडली आहे. तळेगाव दाभाडे शहराजवळच्या कुंडमळा येथे घडलेल्या या दुर्घटनेमुळे संपूर्ण महाराष्ट्रात हळहळ व्यक्त होत आहे. प्राथमिक माहितीनुसार, या घटनेत एकूण २० ते २५ जण वाहून गेल्याची भीती व्यक्त केली जात आहे, तर माध्यमांकडून सहा जणांचा मृत्यू झाल्याची माहिती देण्यात आली आहे. राज्याचे मुख्यमंत्री देवेंद्र फडणवीस यांनी घटनेची माहिती मिळताच दुःख व्यक्त केले असून, प्राथमिक माहितीनुसार दोन लोकांचा मृत्यू झाल्याचे त्यांनी एक्स (माजी ट्विटर) वर पोस्ट करत सांगितले आहे. बचावकार्य युद्धपातळीवर सुरू असून, मृतांचा आकडा वाढण्याची भीती व्यक्त होत आहे.
ही दुर्घटना दुपारी तीन ते साडेतीन वाजण्याच्या सुमारास घडली. ज्यावेळी हा पूल कोसळला, त्यावेळी पुलावर किमान १०० एक पर्यटक असल्याचं सांगण्यात येत आहे. इंद्रायणी नदीच्या पात्रात रांजण खळगे असल्याने कुंडमळा हे ठिकाण प्रसिद्ध आहे. विशेषतः पावसाळ्यात, पुणे परिसरातील पर्यटक शनिवार-रविवारी येथे मोठ्या प्रमाणावर गर्दी करतात. आज अशाच प्रकारची मोठी गर्दी या परिसरात होती. पुलावरून नदीचा प्रवाह आणि रांजण खळगे पाहण्यासाठी पर्यटक पुलावर मोठ्या संख्येने जमा झाले होते. अचानक पुलाचा मधला भाग कोसळला आणि हाहाकार उडाला. पूल कोसळल्यानंतर लोखंडी गर्डरमध्ये अडकून तीन पर्यटकांचा जागीच मृत्यू झाल्याचं सांगण्यात आलं आहे. तर वाहून जाणाऱ्या पाच ते सहा जणांना वाचवण्यात यश आल्याचं माध्यमांकडून सांगण्यात आलं आहे. मात्र, उपस्थितांपैकी अनेकांनी किमान २० ते २५ पर्यटक वाहून गेल्याचं म्हटलं आहे, त्यामुळे मृतांचा आकडा वाढण्याची भीती कायम आहे. मुख्यमंत्री देवेंद्र फडणवीस यांनी आपल्या प्रतिक्रियेत ६ जणांना आतापर्यंत वाचवण्यात यश आल्याचे आणि ३२ लोक जखमी असून, त्यापैकी ६ गंभीर असल्याचं सांगितलं आहे. जखमींना उपचारांसाठी रुग्णालयात दाखल करण्यात आले आहे.
दुर्घटना घडली तो पूल ब्रिटिशकालीन असल्याचं सांगण्यात येत आहे. साधारण चार फूट रुंद असणारा हा पूल फक्त पादचारी मार्ग म्हणून वापरण्यात येत होता. सिमेंटचा पिलर आणि लोखंडाचा वापर करून तयार करण्यात आलेला हा पूल जीर्ण अवस्थेत होता. नव्याने पूल उभारण्याची मागणी अनेक दिवसांपासून होत होती आणि नव्याने पुलाची मागणी मान्यही करण्यात आली होती. त्यामुळेच जुन्या पुलाचा वापर फक्त स्थानिक शेतकऱ्यांनी करावा, अशा सूचना प्रशासनाकडून देण्यात आल्या होत्या. स्थानिक आमदार सुनील शेळके यांनीही हा पूल पर्यटकांसाठी बंद होता आणि स्थानिक शेतकऱ्यांसाठीच तो वापरावा अशा सूचना देण्यात आल्या होत्या, असं स्पष्ट केलं.
परंतु, प्रशासनाकडून पूल बंद असल्याची सूचना लावण्यात आल्याचं सांगण्यात येत असलं तरी, पुलावरती जाण्यासाठी मज्जाव करण्यासाठी प्रशासनामार्फत कोणीच नसल्याचं स्थानिक लोक सांगत आहेत. दुसरीकडे, पूल जीर्ण अवस्थेत होता तरीही प्रशासनाने पुरेशी काळजी घेतली नसल्याचे आरोप आता होत आहेत. या पावसाळ्यापासूनच कुंडमळा येथे पर्यटकांची गर्दी मोठ्या प्रमाणावर होत होती. मागील शनिवारी-रविवारी देखील इथे आलेल्या पर्यटकाला वैद्यकीय मदतीची गरज भासल्यानंतर गर्दीतून मार्ग काढण्यासाठी तासाभराचा वेळ लागल्याचं सांगण्यात येत आहे, ज्यामुळे गर्दीचं स्वरूप किती मोठं होतं हे स्पष्ट होतं. खासदार श्रीरंग बारणे यांनी यावर अधिक बोलताना सांगितले की, पुलाचं स्ट्रक्चरल ऑडिट झालं होतं आणि पूल वाहतुकीसाठी बंद होता तरीही पर्यटकांची मोठी गर्दी या पुलावरती झाली होती. तसंच, या पुलावरती पर्यटकांकडून दुचाकी घेऊन जाण्यात येत असल्याचंही त्यांनी नमूद केलं, ज्यामुळे पुलावरील भार आणखी वाढला असण्याची शक्यता आहे. आमदार सुनील शेळके यांनीही या गर्दीमुळेच पूर्वीपासून जीर्ण असलेला पूल तुटल्याचं सांगितलं आहे
दुर्घटना घडल्यानंतर तातडीने बचावकार्य सुरू करण्यात आले. घटनास्थळी स्थानिक लोकप्रतिनिधी, एनडीआरएफच्या दोन तुकड्या (मुख्यमंत्र्यांनी ‘एनडीआरएफला पाचारण करण्यात आले’ असे नमूद केले) आणि स्थानिक मदत पथक दाखल झाले. राज्याचे मुख्यमंत्री देवेंद्र फडणवीस यांनी तात्काळ या घटनेची दखल घेतली. ते म्हणाले की, “पुणे जिल्ह्यातील तळेगाव नजीक इंदोरी येथे इंद्रायणी नदीवरील एक पूल कोसळून झालेल्या दुर्घटनेचे वृत्त ऐकून अतिशय दुःख झालं. या घटनेमध्ये प्राथमिक माहितीनुसार दोन लोकांचा मृत्यू झाला आहे. मी त्यांना भावपूर्ण श्रद्धांजली अर्पण करतो. त्यांच्या कुटुंबीयांच्या दुःखामध्ये आम्ही सहभागी आहोत. या घटने संदर्भात विभागीय आयुक्त, जिल्हाधिकारी, पोलीस अधीक्षक आणि संबंधित तहसीलदार यांच्याशी मी सातत्याने संपर्कात आहे. काही जण वाहून गेल्याने त्यांचा युद्ध पातळीवरती शोध घेतला जातोय. घटनास्थळी एनडीआरएफला पाचारण करण्यात आले आहे. मदत कार्याला ताताडीने वेग देण्यात आला आहे. सहा जणांना आतापर्यंत वाचवण्यात यश आले आहे. सर्व यंत्रणांना अलर्ट मोडवरती ठेवण्याचे आदेश देण्यात आले आहेत. ३२ लोक जखमी आहेत, त्यापैकी सहा गंभीर आहेत त्यांना उपचारांसाठी रुग्णालयामध्ये दाखल करण्यात आले आहे. स्वतः विभागीय आयुक्त घटनास्थळाकडे रवाना झाले आहेत,” अशी प्रतिक्रिया मुख्यमंत्र्यांनी दिली.
राज्याचे उपमुख्यमंत्री अजित पवार यांनीही या दुर्घटनेनंतर तात्काळ माहिती घेतली. त्यांनी सांगितले की, “मी या घटनेची माहिती घेतली आहे. कलेक्टरांना तिथे पाठवले आहे. याची माहिती घेऊन ते मला कळवणार आहेत. सुनील शेळके तिथे गेलेले आहेत. वेगवेगळी माहिती तिथून मिळत आहे. एनडीआरएफची टीम तिथे गेलेली आहे. आजूबाजूच्या नगरपालिकांच्या टीम तिथे गेले आहेत. प्रथम दर्शनी असं सांगण्यात येत आहे की जो लोखंडी ब्रिज होता तो फार जीर्ण झाला होता. त्याच्यातून जास्त लोक तिथे राहिले आणि मोटरसायकल पण तिथे जात होत्या, त्या बोजाने तो पूल कोसळला,” अशी माहिती अजित पवार यांनी दिली. त्यांनी पुढे असेही सांगितले की, तिथे आठ कोटीचा एक नवीन पूल मंजूर आहे, परंतु त्याबद्दलची सगळी इत्यंभूत माहिती कलेक्टरांना द्यायला सांगितली आहे. त्यामुळे आणखी माहिती काही काळानंतर देईन, असे अजित पवार यांनी स्पष्ट केले.
सध्या तरी बचावकार्य आणि शोधमोहीम वेगाने सुरू आहे. या बचावकार्यानंतर या दुर्घटनेमध्ये नक्की किती नागरिक वाहून गेले, किती जणांचा बळी गेला आणि किती लोक जखमी झाले याची सविस्तर माहिती समोर येईल अशी अपेक्षा आहे. प्रशासनाकडून सध्या नागरिकांना पर्यटन स्थळांवरती जाताना विशेष काळजी घेण्याचे आणि नियमांचे पालन करण्याचे आवाहन करण्यात आले आहे. या संपूर्ण घटनेबद्दलची माहिती आणि अपडेट्स बोल भिडूच्या माध्यमातून सातत्याने जनतेपर्यंत पोहोचवण्यात येत राहतील. या दुर्घटनेमुळे पर्यटन स्थळांवरील सुरक्षिततेचा प्रश्न पुन्हा एकदा ऐरणीवर आला असून, भविष्यात अशा घटना टाळण्यासाठी अधिक प्रभावी उपाययोजना करण्याची गरज अधोरेखित झाली आहे.
